( Tropical Mockingbird )
Chuchubi ta e mihor para kantado ku nos tin.
E ta kanta diferente melodia. Importante ta e palabra " diferente "
pasobra otro para-nan ( majoria ) ta e mesun sonido nan ta ripiti.
Nos hende grandi-nan di antes, por a komprende kiko Chuchubi ta bisa.
E hende grandinan ta bisa ku e Chuchubi por trese notisia of redu.
Si e Chuchubi kuminsa ku un notisia malu, nan sa kore kune.
Chuchubi-nan tin diferente forma pa komunika ku otro.
No solamente ku sonido i kanto e ta hasi esaki, pero
nan tin un forma tambe di " baila " dilanti di otro.
E " baile " aki ta tuma luga na un distansia di 50 cm pa 2 meter.
Aki nan ta hasi algun bula di 5cm kada unu, zwai e kabes ariba/abou
i di links/reks. E rabu ta wordu hisa i baha. Ku e kombinashon
aki ( bula, zwai kabes, i hisa rabu baha ) nan ta komunika.
Por rekonose e Chuchubi na su kolor shinishi, pretu
ku strepi blanku na rabu.
E ta kome tur loke ta disponibel pe, manera:
Insekto, fruta i reptiel.
Nan ta paranan masha teritorial.
Nan ta bringa pa nan teritorio kontra paranan
ku ta asta mas grandi ku nan.
Ora nan kaba di traha un neshi i e momento di pone
webu no a jega ahinda, nan no ta pasa anochi den e neshi.
Nan ta bai drumi un otro kaminda.
Pero prome ku nan bai drumi un otro kaminda, nan ta para
te ora bira skur i vigila e neshi na un distansia, pa otro Chuchubi no kue.
Chuchubi jong