E Wowo grandi na engles jama : Caribbean Buckeye.
Su kolor ta maron-skur saka ku maron mas kla. Den hala e tin algun
dibugo kolor oranjo bunita. Si e habri su hala kompleto por nota ku
e tin 3 bala na kada banda di hala. E bala mas grandi tin kolor puus
den senter. ( Puus ta visibel solamente na e parti di ariba di e hala )
E bala grandi aki tambe e ta usa komo wowo falsu, pa laga
kwalkier enemigu di dje kere ku e ta un bestia grandi.
E ta un Barbulete di 5.5 cm di grandura.
Un jerba hopi importante pa e Barbulete aki ta e " Jerba di Dam ".
E ta chupa nektar for di e flor aki i su Katerpilar tambe ta usa e
blachi di e jerba aki pa kome.
Esaki ta un esepshon hopi grandi, pasobra 99.5 % di bes, un Barbulete
ta chupa nektar di un flor ku ta distinto for di e kuminda di su Katerpilar.
( nos lo bini ku un serie foto [ metamorphosis ] di e spesie aki ).

Algun diferensia entre Mot i Barbulete:
* Antena di Mot no tin punta ku balita.
* Majoria Mot ta insekto di anochi.
* Majoria bia tin kolor dof, Barbulete tin kolor mas bibu.
* Mot ta drumi ku hala plat habri i Barbulete ku hala sera ariba.
* Pupa di Barbulete no ta wordu protega ( ta kologa liber na taki ) i un
Mot si gusta protega su pupa skondi den tera, den un kaska di blachi
of traha di lodo.
* Mot ta reakshona riba klaridad, vibrashon i holor.