Bringamosa ta un di e Mata di mondi hopi problematiko ku nos tin.
No solamente ora e mishi na bo kurpa, pero asta den bo man,
kaminda ta MENOS delikado, e ta grawata pa UN ( 1 ) ora largu
IN-SOPORTABLEMENTE.
Tantu e stam, taki, blachi, simia i tambe e konopi di flor tin e mekanismo
ku ta pone-bo grawata bira loko.
I pa stranjo ku ta parse tin un Katerpillar ku gusta e Bringamosa masha
komo su uniko kuminda. ( Mira foto )
E Katerpillar aki despues di krese bira adulto, lo ta tira su kurpa abou i
koba drenta den tera. Segun e ta koba drenta e ta hunta rant di e buraku
ku seda. E ta sigi hasi esaki te ora su kurpa ta kubri ku tera i tog tin seda
ku ta tene e tera " na un " for di su kurpa.
Esaki ta bisto riba e foto mas abou, kaminda nos a " kria " unu.

2 dia despues ku e ta kubri ku tera e ta konverti den un Krisalys.
E Katerpillar tin un grandura di 7 cm, i e Krisalys 4cm.
12 dia despues di ta dera komo un Krisalys e ta konverti i bira un Mot.
E " Mot di Bringamosa " tin un grandura di 4,5 pa 5 cm, i tin kurpa poko largu
kompara ku otro Mot-nan di su tamajo, mira foto abou.

E tin wowo pretu-pretu, Su kolor ta kompleto shinishi.
Na kada banda riba su hala tin un strepi " dibuga " ta kore.
Na final di su hala tambe ta nota e rant di zag saka ku stip-nan pretu.
Riba i tras di kabes por nota ku e tin algun kabei fini.