E barbulete Rajo di Solo su habitat ta :
Hardin grandi, Kura ku mata, i luga ku jerba fresku.
Naturalmente e luga-nan aki mester tin flor. Nos lo bini
bek riba e tipo di flor-nan i tipo di jerba.

Su nomber so ta bisa e karakter ku e tin. E ta gusta solo hopi.
E tin kolor oranjo bibu ku algun strepi i vlek pretu.
E forma pa rekonose mes ta sinta den 3 sirkulo pretu ku
stip blanku den senter.
Mi ta ripiti: 3 sirkulo pretu ku stip blanku den senter.
Esaki-nan ta keda na e parti mas dilandi di e hala-nan.
Bou di su hala-nan ta kolor mas maron ku stip-nan blanku.

E machu ta bula ront buska pareja. Despues e muhe ta pone webu-nan
na diferente parti di e mata " host ". Mira webu-nan riba foto-1.
E rups ( katapillar ) ta kome tantu di e blachi, taki komo parti abou di flor
di e mata " host ".

Kiko ta un mata " host " i kwa e ta ?
Un mata " host " ta un mata ku e barbulete tin vinkulo ( multiple benefisio )
kune. E benefisio-nan aki ta : E rups por usa e blachi komo kuminda
i tin bia tambe e taki i flor. Tambe e rups por usa e mata komo luga pa
e pega su mes na dje i transforma bira un pupa i pasa su metamorfosis.
Komo ultimo e rups ta usa e mata su kolor, forma di blachi of taki komo
kamuflage ora e transforma den un pupa.
Serka e barbulete Rajo di Solo e mata aki ta : E jerba Dandelion.
Mira foto 5 , 6 i 7 pa rekonose jerba Dandelion. Tur 3 foto ta e mes jerba.
Tambe e jerba: Korona di La-birgen ta un "host ".

Mira riba foto-nan 1, 2 i 3 kon e kurpa di e rups aki ta.
Tur na sumpinja. Esaki e ta usa komo defensa kontra su
enemigu-nan manera Chuchubi , Chuchubi Pretu i Bubi di Baka.
E ta krul su kurpa i e sumpinja-nan ta para steif, loke ta pone ku e
para-nan no por guli e rups aki.
E rups ta midi 3.5 pa 4 cm di largura.
Su kolor ta maron-skur ku strepi oranjo i hil ta kore den su largura.

E barbulete mes su kuminda ta nectar ku e ta chupa for di diferente flor pero
spesial : Lantana ( foto 8 - 9 - 10 - 11 ) i Dandelion ( foto 5 - 6 - 7 ).

Na e momento aki nos tin 2 di e rubs-nan den un botter grandi di plastik.
Huntu ku nan nos a pone e jerba " host " Dandelion.
Door di nan grandura, nan por konverti nan mes den un Pupa un djies.
Esaki nan ta hasi door di kologa kabes abou i kubri nan kurpa ku seda.
E seda lo seka i bira mas duru i tambe kambia di kolor. Esei ta e transformashon
den Pupa.
Riba foto 12 i 13 por mira kon e 2 Rups-nan ku nos tin den un botter-
grandi a bira Pupa.
Foto 14 ta mustra un otro ku nos a laga pa su mes kuenta, kon e la
bai kologa na un waja. Nan ta bai kologa tur kaminda, basta nan
hanja poko solo.
Aunke nan por bai kologa na kualkier kaminda, tog ta keda sumamente
interesante ku si nan kologa na e propio jerba di nan, e protekshon ta
mihor pa nan pasobra nan transformashon den Pupa ta alaves imitashon
di e propio blachi seku di e jerba Dandelion.
Habri e foto 15 i apresia kua ta blachi i kua ta Pupa.
Di e manera aki su protekshon kontra otro bestia-nan ta mas garantisa.
Awor... Interesante pa menshona ku e Rups aki tambe ta "mold".
Kier min, pa e insekto aki sigi krese, e tin ku tira su kaska (vel) bieuw
abou. Meskos ku un Kolebra, i serka e Rups aki esei ta wordu kita ku
tur e sumpinja-nan.
Mira kon esei ta keda riba foto-nan 16 i 17.
Na e foto 18 i 19 por mira e Metamorfosis kompleto.
E momento ei e Barbulete no a bula pa prome bia ahinda.
E posishon ku e tin den e botter, riba foto 18 ta e posishon
kabes ariba pa e saka tur likido di-mas ku e tin den
su kurpa ahinda pa asina e bira mas fofo.
E ta saka e likido aki via su atras.
E proseso aki por dura mas-o-menos 30 minuut.
Foto 20 : E Barbulete ta kompleto kla pa mundu.
Un Rajo di Solo nobo-nobo pa bula broma den hardin.
Foto 21-22-23 : Nan ( ta 2 nan ta )prome vuelo den naturalesa liber.
Por observa klaramente e kontraste di kolor ku nan tin riba hala
kompara ku bou di hala.
Foto 24 : E kaska di un Kokun bashi ku a keda atras.

INDEX-Galeria

HOME-PAGE